乜又係你呀蘋果日報？
都係個句，其實任何有關醫療系統嘅批評我都覺得無咩問題，有問題就傾掂佢，唯一唔可以我亦都睇唔順眼嘅就係老屈。
病人同家屬唔可以咁輕易用醫院餐廳有幾個原因。
一）為左方便，病人家屬希望可以係醫院內買到野食，但係醫護職員都係「受困」係醫院入面，一個鐘頭（甚至更少時間）入面排唔到隊、買唔切飯、或者食唔切，都係完全無辦法。有醫院（例如瑪麗）於是劃出45分鐘嘅職院用餐時間。你以為咁樣係一個雙嬴嘅方法？我唔止一次聽到企係門口嘅職員比病人／家屬問候母親。
二）病人有時候要因應所患嘅病、所需嘅程序、所食嘅藥而需要食特別餐，有時真係連水都唔飲得。醫護人員嘅職責當然係要解釋比病人聽，但家屬知唔知呢？而且見過好多時係個病人自己都記唔清，要求禁食嘅時候會自己批酌情權比自己，「食兩啖包無事嘅」！真係見過好多時因為咁要延遲或者更改醫療程序嘅時間！
就係兩個月前，明報即時新聞出左篇新聞 [1]，話「最少五間私家醫院餐廳係無領牌下向非員工出售食物，部份更以名廚推介菜式招徠」，而且「雖張貼告示『只供本院人士使用』等字眼，但仍無阻非職員訪客輕鬆光顧」，點名批評養和、聖保祿、嘉諾撒、香港港安、聖德肋撒五間私院。報導亦指出「按《食物業規例》，任何人無牌經營食物業，即屬違法，一經定罪，最高可被罰款五萬元名監禁六個月，另加每日罰款九百元」。
病人同埋家屬要方便，當然最好可以使用醫院內嘅餐廳，「違規向非職員出售食物」都只係打開方便之門，咁大家希望執正黎做，「無牌」嘅餐廳只可以改例禁止非職員進內。我亦都係某醫院餐廳內聽過有家屬要求買午餐，職員講笑咁回覆「唔得架，比人告呀！」。執正黎做，就到另一份報紙出黎話「病人同家屬冇啖好食」。
你以為蘋果唔知咩？報導最後一段都自己講返，話醫管局已經解釋左，亦即係中間嘅無啖好食故事都只係用黎煽情。我當然唔係話係呢樣野上面醫院完全無錯同埋無改善空間，可唔可以有職員時間？可唔可以有餐廳開放比大眾有餐廳留返比職員？呢d野可以傾，但絕對唔係用一個咁煽情嘅手法話醫院病人無陰公、無野好食、要挨餓。
[1] 明報《5私院員工食堂涉無牌招待街客 食環指違法 可罰款判囚》
https://news.mingpao.com/…/ar…/20170416/s00002/1492278405031
Search